Առաջին լուսանկարները Սարգիս Գրիգորյանի, Խորեն Լևոնյանի, Աննա Գրիգորյանի և այլ հայտնի դերասանների մասնակցությամբ նոր ֆիլմից

Գարնանը մեծ էկրան կբարձրանա գեղարվեստական նոր ֆիլմ, որը կառուցված է դժվարին փորձություններով անցնող երկու եղբոր պատմության շուրջ: «Ա.Կ.Ա.» աշխատանքային վերնագրով ֆիլմի մասին  Tert.am Life-ն արդեն պատմել է իր ընթերցողներին, այս անգամ մենք եղել ենք նկարահանման հրապարակում, բեքստեյջ լուսանկարներ արել ու զրուցել գլխավոր դերակատարների հետ:

 

Ֆիլմի գլխավոր դերերում հանդես են գալիս Խորեն Լևոնյանն ու Արաբո Գրիգորյանը, որոնք մարմնավորում են երկու եղբայրների,մյուս գլխավոր հերոսը`  Սարգիս Գրիգորյանը նրանց ընկերոջ դերում է: «Ա.Կ.Ա.» դրաման իր վերնագիրը ստացել է երեք գլխավոր հերոսների անունների սկզբնատառերից՝ Արթուր, Կարեն, Արամ:  Ֆիլմում նկարահանվում են մի շարք հայտնի դերասաններ՝ Նարինե Պետրոսյանը, Աննա Գրիգորյանը, Գեորգի Հովակիմյանը, Սամսոն Ստեփանյանը, Սարգիս Մանուկյանը, Մուրադ Նադիրյանը, Իշխան Ղարիբյանը, Արշավիր Փանոսյանը, Սարգսի դուստրը՝ Յանա Գրիգորյանը, Դավիթ Աղաջանյանն ու Աննա Դովլաթյանը:

 

Ֆիլմի գաղափարի հիմքը հանդիսացել է Սարգիս Գրիգորյանի ծանոթությունը ռուսաստանաբնակ դերասան Արաբո Գրիգորյանի հետ: «Երբ ընկերացանք տաղանդավոր դերասան Արաբոյի հետ, հասկացանք, որ պետք է փորձենք ֆիլմարտադրության մեջ քայլ անել: Մեր խնդիրը լավ ֆիլմ անելն էր՝ լավ դերասաններով ու սցերանական լուծումներով: Մտահղացումը հերիք չէր: Սցենարի վրա աշխատել են տարբեր մասնագետներ՝ բալիստիկներ, հոգեբան, աստվածաբան: Ընտրեցինք դերասանական այն կազմը, որը, ըստ իս, այսօր Հայատանում ոչ միայն բավականին լավ անուն ունի, այլև  պրոֆեսիոնալ է»,-ասաց Սարգիսը, որը նաև այս նախագծի պրոդյուսերն է։

 

 

Սարգիսը նշեց, որ ֆիլմի նկարահանումների մեկնարկին նախորդել է շուրջ երեք ամիս տևած նախապատրաստական փուլը: Դերասաններն անցել են երկարատև փորձեր, յուրաքանչյուր կերպարի համար կարվել են համապատասխան զգեստներ:

 

Անդրադառնալով իր կերպարին` Սարգիսը նշեց, որ չպիտի խաղար այս դերը. «Մի գաղտնիք բացեմ, ես պիտի  Խորենի դերը խաղայի, բայց նրան հրավիրեցինք այդ դերի համար, և ես հասկացա, որ սա իրոք Խորենի դերն էր: Ինձ բաժին ընկած դերը իմ կարիերայի ամենադժվար դերերից մեկն է, որովհետև ուրիշ Սարգիս Գրիգորյանի եք ճանաչելու: Կարենը շատ թեթև տղա է, որը փորձում է թեթևացնել երկու եղբայրների միջև ծագած կոնֆլիկտը: Իմ հերոսը կյանքին շատ թեթև է նայում և փորձում է խնդիրները լուծել հավատարմության և ընկերության գծի վրա: Ճակատագրի բերումով ֆիլմում եղբայրները դառնում են թշնամի, բայց անսահման շատ են սիրում իրար»,- պատմեց Սարգիսը:

 

Դերասանի խոսքով` ֆիլմը ներկայացնում է երեք տեսակի սեր. սեր, որն անտեսված է, սեր, որն արժանանում է «Ռոմեո Ջուլիետի» ճակատագրին և սեր, որը ծնվում է  դժբախտությունից: Ֆիլմի սիրային գծերից մեկը ծավալվում է Սարգիս Գրիգորյանի և Աննա Գրիգորյանի հերոսների միջև:

 

Աննան մարմնավորում է Իրինիային, որը մասնագիտությամբ քննիչ է. «Հերոսուհիս շատ ուժեղ կերպար է։ Ունեցել է բարդ անցյալ, որը կարողացել է հաղթահարել: Անցյալի դժվարություններն արտահայտվում են սիրած տղայի հետ հարաբերություններում: Ինձ համար շատ հետաքրքիր էր խաղալ այն, որովհետև այս անգամ լրիվ ուրիշ Աննա ենք տեսնում՝ սկսած սանրվածքից մինչև հագուստի  ոճն ու նաև հոգեվիճակը: Հատուկ այս կերպարի համար ժեստեր են մշակվել: Իմ կերտած մյուս դերերից ամեն մեկում ինձ հետ ընդհանրություններ եղել են, այս անգամ բացարձակապես չկան: Ես շատ եմ սիրում նրան: Իրինա անունն ինձ համար հիմա նույնքան հարազատ է, որքան Աննան»:

 

 

Դերասանուհին նշեց, որ ստեղծագործական թիմի հետ աշխատանքի փորձ ունեցել է, իսկ դերասանական այս կազմի հետ առաջին անգամ է նկարահանվում: «Սարգսի հետ առաջին անգամ էինք աշխատում: Նա հանդես է գալիս իմ սիրած տղայի դերում: Բավականին հետաքրքիր ու պրոֆեսիոնալ է ընթացքը: Ինձ համար շատ հաճելի է, հուսով եմ ՝ իրեն էլ: Միմյանց շատ ենք օգնում»,-ասաց Աննան:

 

«Ա.Կ.Ա.» ֆիլմում իր առաջին դերասանական լուրջ քայլն է անում ռուսաստանաբնակ դերասան Արաբո Գրիգորյանը: Նա մարմնավորում է Արամի կերպարը: Դերասանը նշեց, որ մեծ ցանկություն ունի գործունեությունը հայրենիքում ծավալել, դա կախված կլինի նաև  այս ֆիլմի գրանցած հաջողությունից:

 

«Դեռ մանկուց նպատակ ունեի դերասան դառնալ, նաև զբաղվել ֆիլմերի պրոդյուսինգով: Կարծում եմ, երբ հստակ նպատակներ ես դնում քո առաջ և ջանասիրաբար աշխատում ես, դրանք անպայման իրականացնում ես։ Այս ֆիլմի շուրջ շատ մեծ աշխատանք է տարվել: Ստեղծագործական թիմի բոլոր անդամները մեծ սիրով են մոտենում իրենց գործին: Ի սկզբանե իմ, Սարգսի ու ռեժիսոր Արմեն Միրզոյանի նպատակն էր մարդկանց ցույց տալ, որ Հայաստանում հնարավոր է որակյալ ֆիլմ նկարահանել: Այն նաև ուսուցողական է լինելու դիտողների համար: Յուրաքանչյուր մարդու կյանքում կարող է անսպասելի շրջադարձ լինել։ Մենք պետք է գնահատանեք այստեղ ու այս պահին մեր ունեցածը: Իմ հերոսը թեթև է նայում կյանքին, բայց որոշակի շրջադարձից հետո բազմաթիվ դժվարություններ են առաջ գալիս նրա կյանքում: Նա կարողանում է դրանք հաղթահարել և ապացուցել, որ պետք է համարձակ լինել»,- ասաց Արաբոն:

 

Դերասանը նշեց, որ իր համար պատասխանատու է գլխավոր դեր ստանձնելը: Նրա խոսքով, խաղընկերներն իրեն օգնում են նկարահանման հրապարակում։ «Սկզբում մտածում էի, որ ինձ համար դժվար կլինի, բայց այդպես չէ: Իրականում պրոֆեսիոնալ մարդկանց հետ աշխատելը շատ ավելի հեշտ է, քան նոր նկարահանման հրապարակ մտնող մարդու հետ: Իրենք շատ են օգնում»,-եզրափակեց նա:

 

https://life.tert.am/am/news/2018/10/12/sargis/53430

Be the first to comment on "Առաջին լուսանկարները Սարգիս Գրիգորյանի, Խորեն Լևոնյանի, Աննա Գրիգորյանի և այլ հայտնի դերասանների մասնակցությամբ նոր ֆիլմից"

Leave a comment

Your email address will not be published.




ԴԻՏԵԼ